نیویارک( ویب ڈیسک) میٹا فیس بک کے ڈیزائن اور استعمال کے انداز میں بڑی تبدیلی آزمانے جارہی ہے، جس کے تحت روایتی تحریری اور تصویری پوسٹس کے بجائے ویڈیو مواد کو زیادہ نمایاں کیا جائے گا۔میڈیا رپورٹس کے مطابق نئے ڈیزائن میں فیس بک کھولنے پر صارفین کو روایتی نیوز فیڈ کے بجائے مکمل اسکرین ویڈیو فیڈ نظر آئے گی، جس سے پلیٹ فارم کا تجربہ ٹک ٹاک اور یوٹیوب شارٹس سے ملتا جلتا ہوجائے گا۔میٹا ابتدائی طور پر بھارت میں محدود صارفین کے ساتھ اس نئے ویڈیو پر مبنی ڈیزائن کی آزمائش کر رہی ہے۔ آزمائشی صارفین کو ضرورت پڑنے پر پرانے فیس بک ڈیزائن پر واپس جانے کا اختیار بھی حاصل ہوگا۔رپورٹس کے مطابق موجودہ نیوز فیڈ مکمل طور پر ختم نہیں کی جائے گی بلکہ اسے ایپ کی نیویگیشن میں ثانوی ٹیب کے طور پر برقرار رکھا جائے گا۔میٹا کی جانب سے فی الحال یہ نہیں بتایا گیا کہ نیا ڈیزائن دنیا بھر میں کب متعارف کرایا جائے گا، تاہم کامیاب آزمائش کی صورت میں اسے مرحلہ وار دیگر ممالک تک توسیع دی جاسکتی ہے۔
