فاروق عبداللہ کا الزام، مقبوضہ کشمیر میں دہشتگردی کا ذمہ دار مودی حکومت کو قرار دے دیا

سرینگر( مانیٹرنگ ڈیسک) مقبوضہ کشمیر کے سابق وزیراعلیٰ فاروق عبداللہ نے بھارتی حکومت کو خطے میں جاری دہشتگردی کا ذمہ دار قرار دیتے ہوئے کُلگام اور اسلام آباد کے واقعات کی غیر جانبدارانہ تحقیقات کا مطالبہ کر دیا۔ایک انٹرویو میں فاروق عبداللہ نے بھارتی میڈیا کی جانب سے کُلگام اور اسلام آباد واقعات کو پاکستان سے جوڑنے کی کوششوں کو مسترد کرتے ہوئے سوال اٹھایا کہ اگر دہشتگردی کا خاتمہ ہو چکا ہے تو پھر عام مزدوروں کو نشانہ بنانے والے کون ہیں۔انہوں نے کہا کہ کُلگام واقعے کی حقیقت سامنے لانے کے لیے شفاف اور ایماندارانہ تحقیقات ضروری ہیں۔ فاروق عبداللہ نے کُلگام میں دو غیر مقامی مزدوروں اور اسلام آباد میں پولیس اہلکار کے قتل کے واقعات میں اندرونی سازش کے امکان کا بھی اظہار کیا۔سابق وزیراعلیٰ نے مودی حکومت کے اس دعوے پر بھی سوال اٹھایا کہ سرحدیں محفوظ بنا دی گئی ہیں، ان کا کہنا تھا کہ اگر سکیورٹی کے انتظامات اتنے مؤثر ہیں تو پھر دہشتگرد ملک میں داخل کیسے ہو جاتے ہیں۔