لاہور ( سپورٹس ڈیسک)سابق وفاقی وزیر فواد چوہدری نے پاکستان کرکٹ بورڈ کو مشورہ دیا ہے کہ موجودہ صورتحال میں دوسرا ٹیسٹ جیتنا مشکل دکھائی دے رہا ہے، اس لیے کم از کم اپنی عزت ضرور بچائی جائے۔سماجی رابطے کی ویب سائٹ ایکس پر بیان میں فواد چوہدری نے کہا کہ پی سی بی کے پاس اس معاملے سے نمٹنے کے لیے دو راستے ہیں۔ پہلا یہ کہ بورڈ واضح طور پر کہہ دے کہ وہ اسکائی اسپورٹس سے ناراض ہے اور آئندہ کھیلنے سے انکار کردے۔انہوں نے دوسرا راستہ بتاتے ہوئے کہا کہ کپتان بابر اعظم سابق وزیراعظم عمران خان کے ساتھ ہونے والے سلوک اور اسکائی اسپورٹس کے انٹرویو کے بعد بڑھنے والے دباؤ کو بنیاد بنا کر میچ کھیلنے سے انکار کرسکتے ہیں۔دوسری جانب پاکستان کرکٹ بورڈ نے لارڈز ٹیسٹ کے دوران اسکائی اسپورٹس پر قاسم خان اور سلیمان خان کا انٹرویو نشر کیے جانے کے خلاف باضابطہ شکایت درج کرادی ہے۔واضح رہے کہ لارڈز ٹیسٹ کے دوسرے روز پاکستان کی پوری ٹیم پہلی اننگز میں صرف 110 رنز بنا کر آؤٹ ہوگئی تھی۔ دن کے اختتام تک انگلینڈ نے دوسری اننگز میں 3 وکٹوں کے نقصان پر 81 رنز بنالیے تھے اور اسے مجموعی طور پر 180 رنز کی برتری حاصل تھی۔
