ایف بی آر نے اسٹیل یونٹس کی بجلی پر پانچ روپے فی یونٹ ٹیکس عائد کردیا

اسلام آباد (کامرس ڈیسک) فیڈرل بورڈ آف ریونیو (ایف بی آر) نے مزید اسٹیل مینوفیکچررز، میلٹرز، ری رولرز اور کمپوزٹ یونٹس کی استعمال شدہ بجلی پر پانچ روپے فی یونٹ کے حساب سے سیلز ٹیکس عائد کردیا ہے۔ایف بی آر نے اس حوالے سے سیلز ٹیکس جنرل آرڈر نمبر 16 آف 2026 میں ترمیم کرتے ہوئے تین نئے اداروں کو فہرست میں شامل کرلیا ہے۔6 اگست 2026 کے جنرل آرڈر میں ترمیم کے تحت شامل کیے گئے اداروں میں کے بی انٹرپرائزز، جی ایم بی اسٹیل فرنس اور راجپوت اسٹیل انڈسٹری شامل ہیں۔ایف بی آر کے مطابق ان اداروں کی اہلیت کا تعین ایس آر او 1245(1)/2026، مورخہ 31 جولائی 2026 میں مقرر کردہ معیار کے تحت کیا گیا ہے۔ اس معیار میں اسٹیل مصنوعات کی تیاری کے لیے استعمال ہونے والے اسکریپ اور بجلی کی کھپت، نیز مخصوص ایچ ایس کوڈز کے تحت اسکریپ کی درآمد کو مدنظر رکھا گیا ہے۔ایف بی آر نے واضح کیا ہے کہ ٹیکس دہندگان کی فہرست میں وقتاً فوقتاً تبدیلی کی جاسکتی ہے۔ بورڈ یا متعلقہ کمشنر ان لینڈ ریونیو کی سفارشات پر کسی بھی رجسٹرڈ مینوفیکچرر کی اہلیت کا دوبارہ جائزہ لے کر اسے فہرست میں شامل یا خارج کرسکتا ہے۔