اسلام آباد( کامرس ڈیسک)وفاقی حکومت نے آئندہ مالی سال کا بجٹ 10 جون کو پیش نہ کرنے کا فیصلہ کیا ہے، جبکہ بجٹ پیش کرنے کی نئی تاریخ کا اعلان آج وزارتِ خزانہ کی جانب سے کیے جانے کا امکان ہے۔ذرائع کے مطابق بجٹ مؤخر کرنے کا فیصلہ صدرِ مملکت اور وزیرِ اعظم کی ملاقات میں کیا گیا، جس میں بجٹ سمیت اہم معاشی اور سیاسی امور پر تفصیلی مشاورت ہوئی۔حکومتی ذرائع کا کہنا ہے کہ صوبوں کی جانب سے وفاق کو ایک ہزار سات سو ارب روپے کی فراہمی سے متعلق معاملات پر تکنیکی کمیٹیاں حتمی فیصلہ کریں گی، جن کی تشکیل بھی آج متوقع ہے۔اس حوالے سے قومی اقتصادی کونسل کا اجلاس بھی آج کے بجائے اب 10 جون کو منعقد ہونے کا امکان ہے۔وزیرِ منصوبہ بندی احسن اقبال نے پارلیمنٹ میں غیر رسمی گفتگو کے دوران اس بات کی تصدیق کی کہ بجٹ سے متعلق کئی معاملات تاحال حتمی شکل اختیار نہیں کر سکے اور مشاورت جاری ہے۔ذرائع کے مطابق ایوانِ صدر میں ہونے والی ملاقات میں وزیرِ اعظم، وزیرِ خزانہ سمیت اہم وفاقی وزرا شریک تھے، جہاں ملکی معیشت، سیاسی صورتحال اور آئندہ بجٹ کے خدوخال پر تبادلہ خیال کیا گیا۔
