زیورخ( سپورٹس ڈیسک)فیفا نے عالمی سطح پر ہونے والی شدید مخالفت کے بعد ورلڈ کپ سمیت بڑے فٹبال ٹورنامنٹس میں نجی سرمایہ کاری کی اجازت دینے کا متنازع منصوبہ ختم کرنے کا اعلان کر دیا ہے۔بین الاقوامی خبر رساں ادارے کے مطابق فیفا کے صدر جیانی انفانٹینو نے کہا کہ اس تجویز کے باعث فٹبال برادری میں اختلافات پیدا ہوئے، اس لیے اسے جاری رکھنا کھیل کے مفاد میں نہیں۔منصوبے کے تحت فیفا کی 211 رکن فٹبال ایسوسی ایشنز کو حمایت کے بدلے 4 کروڑ ڈالر فراہم کرنے کی پیشکش کی گئی تھی، تاہم یورپی فٹبال تنظیم یوئیفا، ایشین فٹبال کنفیڈریشن (اے ایف سی) اور کونکاکاف نے اس کی مخالفت کی۔یوئیفا نے خبردار کیا تھا کہ اگر یہ منصوبہ نافذ کیا گیا تو اس کے رکن ممالک ورلڈ کپ کے بائیکاٹ کا فیصلہ کر سکتے ہیں۔فیفا کے سینئر مشیر کارلوس کورڈیرو نے بھی اس منصوبے کو فٹبال کے مستقبل کے لیے نقصان دہ قرار دیتے ہوئے اپنے عہدے سے استعفیٰ دے دیا، جبکہ چیف آپریٹنگ آفیسر کیون لامور نے اعتراف کیا کہ فیفا انتظامیہ کو بھی اس معاملے پر درست معلومات فراہم نہیں کی گئیں۔شدید دباؤ کے بعد جیانی انفانٹینو نے کہا کہ وہ تمام متعلقہ فریقوں کو دوبارہ مذاکرات کی میز پر لانا چاہتے ہیں تاکہ باہمی مشاورت سے فٹبال کے مستقبل سے متعلق فیصلے کیے جا سکیں۔ آئندہ سال ہونے والے فیفا صدارتی انتخابات سے قبل اس معاملے پر ان پر دباؤ مزید بڑھ گیا ہے۔
