لاہور ( سپورٹس ڈیسک)فیفا ورلڈ کپ 2026 نے باضابطہ طور پر فٹبال کی تاریخ کے سب سے بڑے عالمی ٹورنامنٹ کا اعزاز حاصل کر لیا ہے، جس میں پہلی بار 48 ٹیمیں اور مجموعی طور پر 1248 کھلاڑی میدان میں اتریں گے۔یہ میگا ایونٹ 12 جون سے شروع ہو گا اور اس کی میزبانی امریکا، میکسیکو اور کینیڈا مشترکہ طور پر کریں گے۔ یہ پہلا موقع ہے کہ ورلڈ کپ ایک ساتھ تین ممالک میں منعقد کیا جا رہا ہے۔اس بار ٹورنامنٹ کا فارمیٹ مکمل طور پر تبدیل کر دیا گیا ہے، جس کے تحت 48 ٹیموں کو 12 گروپس میں تقسیم کیا گیا ہے اور ہر گروپ میں 4 ٹیمیں شامل ہوں گی۔مجموعی طور پر ایونٹ میں 104 میچز کھیلے جائیں گے، جس کے باعث مقابلے مزید طویل، دلچسپ اور سنسنی خیز ہونے کی توقع ہے۔رپورٹس کے مطابق اس ورلڈ کپ میں شامل 1248 کھلاڑیوں میں سے 357 کھلاڑی ایسے ہیں جو پہلے بھی عالمی کپ میں حصہ لے چکے ہیں، جبکہ 891 کھلاڑی پہلی بار اس بڑے اسٹیج پر اپنی صلاحیتوں کا مظاہرہ کریں گے۔
