اسلام آباد( کامرس ڈیسک)وفاقی وزیر خزانہ محمد اورنگزیب نے کہا ہے کہ حکومت نے بجٹ کے ذریعے اپنی واضح معاشی سمت متعین کر دی ہے، اور یہ بجٹ ترقی اور شرح نمو میں اضافے کا باعث بنے گا۔قومی اسمبلی میں بجٹ پر عمومی بحث سمیٹتے ہوئے انہوں نے کہا کہ فنانس بل 2026 میں مزید تجاویز شامل کرنے کا ارادہ ہے جبکہ ڈیجیٹائزیشن اور مصنوعی ذہانت کے ذریعے صوابدیدی اختیارات کے خاتمے کی سمت بھی پیش رفت کی جا رہی ہے۔وزیر خزانہ نے کہا کہ بجٹ میں اراکین اسمبلی کی تجاویز کو شامل کیا گیا ہے، تاہم بجٹ دستاویزات سے متعلق بعض اعتراضات غلط تشریح پر مبنی تھے۔انہوں نے وضاحت کی کہ جی ڈی پی سمیت دیگر معاشی اشاریے نیشنل اکاؤنٹس کمیٹی کے ذریعے تیار کیے جاتے ہیں جس میں صوبے بھی شامل ہوتے ہیں، اس لیے اعداد و شمار کو درست تناظر میں دیکھنا ضروری ہے۔محمد اورنگزیب کے مطابق حکومت نے گزشتہ دو سال میں 14 ارب ڈالر کے اضافی محصولات حاصل کیے ہیں، جبکہ ایف بی آر کی تنظیم نو اور مالی وسائل کے بہتر انتظام کو ترجیح دی گئی ہے۔
