پشاور میں پہلی بار روبوٹک سرجری کا آغاز، جدید علاج سے مریضوں کو بڑا ریلیف ملنے لگا

پشاور( پاکستان خبر)پشاور کے لیڈی ریڈنگ ہسپتال میں پہلی بار روبوٹک سرجری کا آغاز کر دیا گیا ہے، جس سے مریضوں کو جدید طبی سہولیات اپنے شہر میں ہی میسر آئیں گی۔تفصیلات کے مطابق اس جدید طریقہ علاج کے بعد بعض بیماریوں کے لیے مریضوں کو دیگر شہروں کا رخ نہیں کرنا پڑے گا۔ ابتدائی روبوٹک سرجریز کی ورکشاپ ہسپتال کے یورولوجی شعبے اور برطانیہ سے تعلق رکھنے والے سینئر ڈاکٹروں کے باہمی تعاون سے منعقد کی گئی۔ہسپتال کے ترجمان محمد عاصم کے مطابق روبوٹک سرجری ایک جدید طریقہ علاج ہے جس میں آپریشن ڈاکٹر ہی کرتے ہیں، تاہم انہیں جدید روبوٹک نظام کی مدد حاصل ہوتی ہے۔ اس نظام کے ذریعے نہایت باریک آلات اور اعلیٰ معیار کے کیمرے استعمال کیے جاتے ہیں جو جسم کے اندرونی حصوں کو واضح انداز میں دکھاتے ہیں۔ماہرین کا کہنا ہے کہ اس ٹیکنالوجی کی بدولت پیچیدہ آپریشن زیادہ درستگی کے ساتھ کیے جا سکتے ہیں اور انسانی غلطیوں کے امکانات کم ہو جاتے ہیں۔ اس طریقہ کار سے کم زخم، کم خون کا ضیاع، انفیکشن کے کم امکانات اور مریضوں کی جلد صحت یابی ممکن ہوتی ہے۔یورولوجی شعبے کی سربراہ ڈاکٹر عذرا غنی اور ان کی ٹیم کے مطابق روبوٹک سرجری ورکشاپ ایک اہم پیش رفت ہے جس میں ہسپتال انتظامیہ کی مکمل معاونت حاصل رہی۔