اسلام آباد( کامرس ڈیسک) عالمی مالیاتی فنڈ (آئی ایم ایف) کے مشن نے پاکستان کے ساتھ چوتھے جائزہ مذاکرات کے سلسلے میں اسٹیٹ بینک حکام کی بریفنگ پر اطمینان کا اظہار کیا ہے۔ذرائع کے مطابق آئی ایم ایف مشن باقاعدہ مذاکرات کیلئے آج کراچی سے اسلام آباد پہنچے گا، جبکہ معاشی ٹیم کے ساتھ پالیسی سطح کے مذاکرات پیر سے شروع ہوں گے۔وزارت خزانہ کے ذرائع کا کہنا ہے کہ آئی ایم ایف مشن گزشتہ 3 روز سے کراچی میں موجود تھا، جہاں اس کی اسٹیٹ بینک حکام اور سندھ حکومت سے بات چیت ہوئی۔سندھ حکومت نے وفاق کو سرپلس بجٹ فراہم کرنے سے متعلق بریفنگ دی اور بتایا کہ 30 جون تک صوبے کی ٹیکس آمدنی 593 ارب روپے رہی، جبکہ نان ٹیکس آمدنی دگنی ہوکر 80 ارب روپے سے تجاوز کرگئی۔ذرائع کے مطابق اسٹیٹ بینک حکام نے آئی ایم ایف مشن کو ملکی معاشی کارکردگی، زرمبادلہ ذخائر، مانیٹری پالیسی، درآمدات اور فارن ایکسچینج سے متعلق بریفنگ دی، جس پر مشن نے اطمینان کا اظہار کیا۔بریفنگ میں بتایا گیا کہ زرمبادلہ ذخائر 17 ارب ڈالر سے زائد رکھنے کا ہدف حاصل کرلیا گیا ہے، جبکہ کرنٹ اکاؤنٹ خسارے اور براہ راست غیر ملکی سرمایہ کاری میں اضافے سے متعلق بھی مشن کو آگاہ کیا گیا۔
