فرانس میں 15 سال سے کم عمر بچوں پر سوشل میڈیا کے استعمال پر پابندی

پیرس( ویب ڈیسک) فرانس نے 15 سال سے کم عمر بچوں کے لیے سوشل میڈیا کے استعمال پر پابندی کا قانون منظور کر لیا ہے، جس پر جنوری 2027 سے عمل درآمد شروع ہوگا۔بین الاقوامی میڈیا رپورٹس کے مطابق نئے قانون کے تحت 15 سال سے کم عمر بچوں کو سوشل میڈیا پلیٹ فارمز استعمال کرنے کی اجازت نہیں ہوگی، جبکہ تمام صارفین کے لیے عمر کی تصدیق لازمی قرار دی گئی ہے تاکہ قانون پر مؤثر عمل درآمد یقینی بنایا جا سکے۔رپورٹس کے مطابق اس اقدام کے بعد فرانس کم عمر افراد کی سوشل میڈیا تک رسائی محدود کرنے والا پہلا یورپی ملک بن جائے گا۔حکام کا کہنا ہے کہ یہ فیصلہ بچوں کی ذہنی صحت پر سوشل میڈیا کے ممکنہ منفی اثرات سے متعلق بڑھتے ہوئے خدشات کے پیش نظر کیا گیا ہے۔رپورٹس میں یہ بھی بتایا گیا ہے کہ برطانیہ اور یورپی یونین کے رکن ممالک بھی کم عمر صارفین کے لیے اسی نوعیت کی پابندیوں اور ضوابط پر غور کر رہے ہیں۔