اسلام آباد( کامرس ڈیسک)اسلام آباد: نئے مالی سال کے آغاز پر حکومت نے پیٹرولیم مصنوعات پر عائد لیویز کی شرح میں ردوبدل کر دیا ہے۔ایکسپریس نیوز کے مطابق حکومت نے پیٹرول اور ڈیزل پر عائد کلائمیٹ سپورٹ لیوی میں ڈھائی روپے فی لیٹر اضافہ کرتے ہوئے اسے 2.5 روپے سے بڑھا کر 5 روپے فی لیٹر کر دیا ہے۔اس کے ساتھ ہی حکومت نے پیٹرولیم لیوی میں بھی پیٹرول اور ڈیزل دونوں پر ڈھائی روپے فی لیٹر کمی کر دی ہے۔ حکام کے مطابق یہ کمی کلائمیٹ سپورٹ لیوی میں اضافے کو متوازن کرنے کے لیے کی گئی ہے۔سرکاری وضاحت کے مطابق دونوں لیویز میں اس ردوبدل کے باوجود مجموعی طور پر پیٹرول اور ڈیزل کی قیمتوں میں کوئی تبدیلی نہیں کی گئی اور عوام کو کوئی اضافی بوجھ نہیں پڑا۔حکومت کا کہنا ہے کہ یہ اقدام محض ٹیکس ڈھانچے میں ایڈجسٹمنٹ کے طور پر کیا گیا ہے، جس کا مقصد مالیاتی پالیسی کو متوازن رکھنا ہے۔
