آزاد کشمیر میں عام انتخابات 27 جولائی کو شیڈول کے مطابق ہوں گے: الیکشن کمیشن

مظفرآباد(پاکستان خبر)ترجمان الیکشن کمیشن آزاد جموں و کشمیر کے مطابق آزاد کشمیر میں عام انتخابات 27 جولائی کو شیڈول کے مطابق منعقد ہوں گے۔ترجمان نے کہا کہ اسمبلی کی آئینی مدت اور قانونی تقاضوں کے باعث 5 جون کو انتخابی شیڈول جاری کیا گیا تھا۔انہوں نے واضح کیا کہ انتخابات کے التوا سے متعلق قیاس آرائیاں بے بنیاد ہیں اور انتخابی شیڈول مکمل طور پر آئینی و قانونی تقاضوں کے مطابق جاری کیا گیا ہے۔ترجمان الیکشن کمیشن کے مطابق انتخابی عمل کو کسی سیاسی مقصد کے تحت نہیں چلایا جا رہا۔ انہوں نے کہا کہ بروقت انتخابات کا انعقاد آئینی ذمہ داری ہے۔مزید کہا گیا کہ آزاد کشمیر میں شفاف، آزادانہ اور غیر جانبدارانہ انتخابات کا انعقاد یقینی بنایا جائے گا۔