جنوبی بحرالکاہل( ویب ڈیسک)جنوبی بحرالکاہل میں کُک جزائر کے جنوب مغربی علاقے کے قریب گہرے سمندر کی تحقیق کے دوران ماہرین کو کئی بڑے فوسل دانت ملے ہیں، جنہیں قدیم دیوہیکل شارک میگالوڈون سے منسوب کیے جانے کا امکان ظاہر کیا گیا ہے۔امریکی قومی سمندری و فضائی انتظامیہ کی جانب سے ایک ماہ تک جاری رہنے والے گہرے سمندری سروے میں تحقیقاتی ٹیم کو سمندر کی تہہ سے متعدد کثیر دھاتی گولے ملے۔ بعدازاں ان میں سے بعض دریافتوں کی شناخت ممکنہ طور پر قدیم شارک کے فوسل دانتوں کے طور پر کی گئی۔رپورٹ کے مطابق دریافت ہونے والے کچھ دانتوں کی لمبائی 7 سینٹی میٹر سے زیادہ ہے، جس کے باعث محققین کا خیال ہے کہ یہ میگالوڈون کے دانت ہوسکتے ہیں۔میگالوڈون کو تاریخ کی سب سے بڑی اور طاقتور شکاری شارکس میں شمار کیا جاتا ہے۔ یہ دیوہیکل مخلوق لاکھوں برس قبل سمندروں میں موجود تھی اور سائنسی اندازوں کے مطابق تقریباً 30 لاکھ سال پہلے معدوم ہوگئی۔اگر فوسل دانتوں کا تعلق میگالوڈون سے ثابت ہوجاتا ہے تو اس دریافت سے قدیم سمندری حیات اور اس دیوہیکل شکاری کی زندگی کے بارے میں اہم معلومات حاصل ہونے کی توقع ہے۔
