گلگت بلتستان انتخابات: دیامر کے 3 حلقوں کے حتمی نتائج جاری، آزاد امیدواروں کی حکومتی جماعت میں شمولیت

گلگت(پاکستان خبر)گلگت میں گلگت بلتستان قانون ساز اسمبلی کے عام انتخابات کے تحت دیامر کے تین حلقوں کے حتمی سرکاری نتائج کا اعلان کر دیا گیا ہے۔ریٹرننگ افسر کے مطابق جی بی اے 15 چلاس سے آزاد امیدوار محمد دلپذیر 5962 ووٹ لے کر کامیاب قرار پائے، جی بی اے 17 سے پاکستان پیپلز پارٹی کے محمد نسیم 8954 ووٹ لے کر جیت گئے جبکہ جی بی اے 18 تانگیر سے پاکستان مسلم لیگ (ن) کے کفایت الرحمٰن 6081 ووٹ لے کر منتخب ہوئے۔انتخابات کے بعد کئی آزاد امیدواروں نے استحکام پاکستان پارٹی میں شمولیت اختیار کر لی ہے۔ اطلاعات کے مطابق آزاد ارکان نے وفاقی وزیر علیم خان سے ملاقات کے دوران پارٹی میں شامل ہونے کا اعلان کیا۔شمولیت اختیار کرنے والوں میں انور علی، اسد شفیق، محمد دل پذیر اور امان علی شامل ہیں۔مجموعی نتائج کے مطابق پاکستان پیپلز پارٹی نے 10، مسلم لیگ (ن) نے 5، استحکام پاکستان پارٹی نے 4، آزاد امیدواروں نے 2 اور ایم ڈبلیو ایم نے 1 نشست حاصل کی ہے، جبکہ دو حلقوں کے نتائج کا اعلان ابھی باقی ہے۔اس حوالے سے چیئرمین پیپلز پارٹی بلاول بھٹو زرداری نے کہا ہے کہ انہیں امید ہے کہ گلگت بلتستان میں ان کی جماعت حکومت بنانے میں کامیاب ہو جائے گی۔