گلگت بلتستان انتخابات: اعلیٰ حکام کے داخلے پر پابندی اور سخت ضابطہ اخلاق نافذ

گلگت بلتستان (پاکستان خبر) انتخابات کے سلسلے میں انتخابی عمل کو شفاف اور غیر جانبدار بنانے کے لیے اہم فیصلے کیے گئے ہیں۔ انتخابی مہم کے دوران وفاقی وزراء، چیئرمین سینیٹ، صدر اور وزیراعظم کے علاقے میں داخل ہو کر انتخابی سرگرمیوں میں حصہ لینے پر پابندی عائد کر دی گئی ہے۔چیف الیکشن کمشنر راجہ شہباز خان نے واضح کیا ہے کہ انتخابات کے دوران ضابطۂ اخلاق پر مکمل اور سختی سے عمل درآمد یقینی بنایا جائے گا۔ انہوں نے کہا کہ اگر کسی امیدوار یا متعلقہ فرد کی جانب سے ضابطۂ اخلاق کی خلاف ورزی کی گئی تو اسے نااہل قرار دیا جا سکتا ہے۔الیکشن کمیشن نے گلگت بلتستان میں انتخابات کے لیے دفعہ دو سو چونتیس نافذ کر دی ہے۔ تمام سیاسی جماعتوں کو یکساں اہمیت دی جا رہی ہے اور کسی بھی قسم کی خلاف ورزی ہرگز برداشت نہیں کی جائے گی۔انتخابات کے دوران سیکیورٹی کے لیے مکمل منصوبہ تیار کر لیا گیا ہے جسے تین مختلف حصوں میں تقسیم کیا گیا ہے تاکہ امن و امان کی صورتحال کو مؤثر طور پر برقرار رکھا جا سکے۔چیف الیکشن کمشنر نے مزید کہا ہے کہ ضابطۂ اخلاق کی خلاف ورزی کرنے والے امیدوار یا فرد کو گلگت بلتستان سے بے دخل بھی کیا جا سکتا ہے۔