اسلام آباد( کامرس ڈیسک) کابینہ کی اقتصادی رابطہ کمیٹی (ای سی سی) نے 108 ہزار میٹرک ٹن چینی کی برآمد کے لیے بین الاقوامی ٹینڈر طلب کرنے کی اصولی منظوری دے دی۔وزیر خزانہ و محصولات محمد اورنگزیب کی زیر صدارت ہونے والے اجلاس میں وزارت قومی غذائی تحفظ و تحقیق کی جانب سے پیش کی گئی سمری کا جائزہ لیا گیا۔اجلاس کو بتایا گیا کہ مذکورہ چینی ٹریڈنگ کارپوریشن آف پاکستان (ٹی سی پی) کے پاس موجود ہے اور یہ گزشتہ سال شوگر سے متعلق کابینہ کی قائم کردہ اسٹیئرنگ کمیٹی کی سفارش پر درآمد کیے گئے 3 لاکھ میٹرک ٹن چینی کے ذخیرے کا حصہ ہے۔ای سی سی نے فیصلہ کیا کہ چینی کی برآمد کے لیے بین الاقوامی ٹینڈر کا تمام عمل پی پی آر اے رولز 2004 کے تحت سختی سے مکمل کیا جائے گا۔
