کیلیفورنیا( ویب ڈیسک)جی میل استعمال کرنے والے اکثر افراد کبھی نہ کبھی غلط شخص کو ای میل بھیج دیتے ہیں یا پیغام ارسال کرنے کے بعد کسی غلطی کا احساس ہوتا ہے، تاہم گوگل نے اس مسئلے کا آسان حل برسوں پہلے متعارف کرا دیا تھا۔جی میل میں موجود ان ڈو سینڈ فیچر صارفین کو بھیجی گئی ای میل فوری واپس لینے کی سہولت دیتا ہے، تاکہ وہ اسے درست کر سکیں یا غلط پتے پر بھیجنے سے بچ سکیں۔یہ فیچر پہلی بار 2009 میں متعارف کرایا گیا تھا اور ابتدائی طور پر جی میل لیبز کا حصہ تھا، تاہم 2015 میں اسے تمام صارفین کے لیے مستقل طور پر دستیاب کر دیا گیا۔ اس کے باوجود آج بھی بہت سے صارفین اس سہولت سے لاعلم ہیں۔ای میل بھیجنے کے فوراً بعد اسکرین کے نیچے ان ڈو کا آپشن ظاہر ہوتا ہے، جس پر کلک کرتے ہی ای میل وصول کنندہ تک پہنچنے سے پہلے واپس آ جاتی ہے۔اس فیچر کی خاص بات یہ ہے کہ اگر مقررہ وقت کے اندر ای میل واپس لے لی جائے تو وصول کنندہ کو اس کا کوئی علم نہیں ہوتا۔جی میل میں ان ڈو سینڈ کا دورانیہ پہلے سے 5 سیکنڈ مقرر ہوتا ہے، تاہم صارفین سیٹنگز میں جا کر اسے بڑھا کر 30 سیکنڈ تک کر سکتے ہیں۔یہ فیچر غلط ای میل ایڈریس پر پیغام بھیجنے، تحریر میں غلطی رہ جانے یا آخری لمحے میں رائے تبدیل ہونے کی صورت میں نہایت مفید ثابت ہوتا ہے اور صارفین کو عام غلطیوں سے بچانے میں مدد دیتا ہے۔
