کراچی( کامرس ڈیسک) عالمی اور ملکی منڈیوں میں سونے کی قیمت میں کمی جبکہ چاندی کے نرخوں میں اضافہ ریکارڈ کیا گیا ہے۔بین الاقوامی بلین مارکیٹ میں پیر کے روز سونے کی فی اونس قیمت 18 ڈالر کم ہوکر 4 ہزار 436 ڈالر کی سطح پر آگئی۔عالمی قیمتوں میں کمی کے اثرات مقامی صرافہ بازاروں پر بھی پڑے، جہاں کاروباری ہفتے کے پہلے روز 24 قیراط فی تولہ سونے کی قیمت ایک ہزار 800 روپے گھٹ کر 4 لاکھ 66 ہزار 136 روپے ہوگئی۔اسی طرح 10 گرام سونے کا بھاؤ بھی ایک ہزار 414 روپے کم ہوکر 3 لاکھ 99 ہزار 636 روپے کی سطح پر آگیا۔دوسری جانب سونے کے برعکس چاندی کے نرخوں میں اضافہ ہوا۔ ملک میں فی تولہ چاندی 67 روپے مہنگی ہوکر 7 ہزار 179 روپے جبکہ 10 گرام چاندی 57 روپے اضافے کے بعد 6 ہزار 154 روپے کی ہوگئی۔
