سونا مہنگا، چاندی کی قیمت میں کمی ریکارڈ

کراچی( کامرس ڈیسک)عالمی اور مقامی صرافہ مارکیٹوں میں سونے کی قیمت میں اضافہ جبکہ چاندی کے نرخوں میں کمی دیکھی گئی ہے۔بین الاقوامی بلین مارکیٹ میں فی اونس سونے کی قیمت 10 ڈالر بڑھ کر 4 ہزار 50 ڈالر کی سطح پر پہنچ گئی، جس کے اثرات مقامی مارکیٹ پر بھی پڑے۔صرافہ مارکیٹوں میں فی تولہ سونے کی قیمت ایک ہزار روپے اضافے کے بعد 4 لاکھ 27 ہزار 436 روپے ہوگئی، جبکہ 10 گرام سونے کے نرخ 857 روپے بڑھ کر 3 لاکھ 66 ہزار 457 روپے کی سطح پر پہنچ گئے۔دوسری جانب سونے کے برعکس عالمی مارکیٹ میں چاندی کی قیمت میں کمی ریکارڈ کی گئی۔ فی اونس چاندی 76 سینٹس سستی ہوکر 57 ڈالر 36 سینٹس پر آگئی۔مقامی مارکیٹ میں بھی چاندی کی قیمت کم ہوئی، جہاں فی تولہ چاندی 76 روپے کمی کے بعد 6 ہزار 215 روپے، جبکہ 10 گرام چاندی 65 روپے کمی کے بعد 5 ہزار 328 روپے کی سطح پر آگئی۔