کراچی/اسلام آباد (کامرس ڈیسک) ملک بھر میں جاری گڈز ٹرانسپورٹرز کی پہیہ جام ہڑتال کے خاتمے کے لیے وفاقی حکومت اور آل پاکستان گڈز ٹرانسپورٹ اتحاد کے درمیان مذاکرات شروع ہوگئے۔حکومتی وفد میں وزیر مواصلات عبدالعلیم خان، وزیر پٹرولیم پرویز علی ملک، وزیر بحری امور اور وزارت خزانہ کے نمائندے شامل ہیں، جبکہ ٹرانسپورٹرز کی جانب سے صدر ملک شہزاد اعوان سمیت چوہدری قمر زمان گل، ملک شبر خان، نثار حسین جعفری، امداد حسین نقوی اور چوہدری اویس مذاکرات میں شریک ہیں۔دوسری جانب ملک بھر میں مال بردار گاڑیوں کی ہڑتال تیسرے روز بھی جاری ہے۔ ٹرانسپورٹ رہنماؤں کے مطابق کراچی سے چترال تک چھوٹی بڑی مال بردار گاڑیاں سڑکوں پر کھڑی ہیں۔رہنماؤں کا کہنا ہے کہ تین روز سے جاری احتجاج کے باعث پھلوں اور سبزیوں سے لدی سیکڑوں گاڑیاں بھی رکی ہوئی ہیں، جس سے کاروباری سرگرمیاں اور اشیائے ضروریہ کی ترسیل متاثر ہورہی ہے۔ٹرانسپورٹرز نے خبردار کیا ہے کہ مطالبات تسلیم نہ کیے گئے تو ہڑتال غیرمعینہ مدت تک جاری رکھی جائے گی۔ مذاکرات میں مطالبات پر غور اور احتجاج ختم کرنے کے معاملے پر بات چیت جاری ہے۔
