کیلیفورنیا (ویب ڈیسک)ٹیکنالوجی کمپنی گوگل نے 10 اگست 2026 سے کمپیوٹر میں محفوظ تصاویر کے بیک اپ کے نظام میں اہم تبدیلی کا اعلان کردیا، جس کے تحت گوگل ڈرائیو کے ڈیسک ٹاپ بیک اپ اور گوگل فوٹوز کے درمیان تصاویر کی خودکار منتقلی ختم کردی جائے گی۔یہ تبدیلی ان صارفین کو متاثر کرے گی جو کمپیوٹر میں موجود تصاویر کے فولڈرز کا بیک اپ گوگل ڈرائیو کے ذریعے لیتے ہیں اور انہیں گوگل فوٹوز میں خودکار طور پر محفوظ ہونے کی توقع ہوتی ہے۔تصاویر کا نیا بیک اپ طریقہ10 اگست کے بعد صارفین کو تصاویر کا بیک اپ براہ راست گوگل فوٹوز کے ذریعے ترتیب دینا ہوگا۔ اس مقصد کے لیے گوگل فوٹوز کھول کر اوپری دائیں جانب موجود جمع کے نشان پر کلک کرنا ہوگا، پھر بیک اپ فولڈرز کا انتخاب کرکے مطلوبہ فولڈرز منتخب کرنا ہوں گے۔اس کے بعد تصاویر کے بیک اپ کے لیے ضروری اجازت دینا ہوگی۔ بیک اپ کا عمل خودکار طور پر جاری رہے گا، تاہم اس کے لیے گوگل فوٹوز کی ویب سائٹ یا مخصوص ویب ایپ کو کھلا رکھنا ضروری ہوگا۔میک صارفین کے لیے ایک اضافی پابندی بھی ہوگی، کیونکہ گوگل فوٹوز ایپل کی تصاویر لائبریری کا براہ راست خودکار بیک اپ نہیں لے سکے گا۔ ایسے صارفین کو پہلے اپنی تصاویر آئی کلاؤڈ کے ذریعے ہم آہنگ کرنا ہوں گی، جس کے بعد آئی فون یا آئی پیڈ پر گوگل فوٹوز ایپ کے ذریعے انہیں محفوظ کیا جاسکے گا۔
