گوگل کا پاکستانی طلبہ کیلئے جیمنائی کی ایک سالہ مفت سبسکرپشن کا اعلان

اسلام آباد( ویب ڈیسک) پاکستان میں پہلے مقامی دفتر کے قیام کے ساتھ گوگل نے ملک بھر کے طلبہ کے لیے مصنوعی ذہانت کی سہولت مفت فراہم کرنے کا اعلان کردیا۔گوگل کے نائب صدر ولسن وائٹ نے تقریب سے خطاب کرتے ہوئے بتایا کہ کمپنی پاکستان کے تمام طلبہ کو گوگل جیمنائی کی ایک سالہ سبسکرپشن بلا معاوضہ دے گی، جس کا باضابطہ اعلان رواں ہفتے کے اختتام پر متوقع ہے۔انہوں نے کہا کہ وزیراعظم شہباز شریف کی پاکستان کو 30 ارب ڈالر کی آئی ٹی برآمدات کا مرکز بنانے کی خواہش گوگل کے اہداف سے بھی ہم آہنگ ہے۔ولسن وائٹ کے مطابق گزشتہ ایک دہائی کے دوران گوگل نے پاکستان میں مقامی کاروباروں اور گھرانوں کے لیے 3.9 ٹریلین روپے سے زیادہ کی معاشی سرگرمی میں معاونت کی، جبکہ کمپنی کے ماحولیاتی نظام نے 9 لاکھ 60 ہزار سے زائد ملازمتوں کو سہارا دیا۔گوگل کے نائب صدر نے پاکستان میں کمپنی کی آئندہ سرمایہ کاری اور منصوبوں کا عندیہ دیتے ہوئے کہا کہ یہ سفر ابھی صرف شروع ہوا ہے۔دوسری جانب تقریب کے بعد وفاقی وزیر برائے انفارمیشن ٹیکنالوجی شزا فاطمہ خواجہ نے سماجی رابطے کے پلیٹ فارم ایکس پر گوگل کو پاکستان میں خوش آمدید کہا۔