گوگل اسسٹنٹ کا دور ختم، اینڈرائیڈ صارفین اب جیمنائی استعمال کریں گے

 کیلیفورنیا( ویب ڈیسک)اینڈرائیڈ فونز میں برسوں سے استعمال ہونے والا گوگل اسسٹنٹ جلد ماضی کا حصہ بن جائے گا، کیونکہ گوگل نے اسے مرحلہ وار ختم کرکے اس کی جگہ اپنے مصنوعی ذہانت پر مبنی اسسٹنٹ جیمنائی کو متعارف کرانے کا فیصلہ کیا ہے۔گوگل اسسٹنٹ کو پہلی بار مئی 2016 میں ایلو ایپ کے ذریعے پیش کیا گیا تھا، تاہم اب کمپنی اپنے جدید اے آئی چیٹ بوٹ جیمنائی کو تمام ڈیوائسز پر مرکزی اسسٹنٹ بنا رہی ہے۔رپورٹ کے مطابق گوگل نے بعض صارفین کو ای میل کے ذریعے آگاہ کیا ہے کہ 4 ستمبر 2026 سے گوگل اسسٹنٹ اینڈرائیڈ فونز، ٹیبلیٹس اور وئیر ایبل ڈیوائسز پر دستیاب نہیں ہوگا۔اگرچہ گوگل نے یہ تبدیلی 2025 میں متعارف کرانے کا منصوبہ بنایا تھا، تاہم بعد میں گوگل اسسٹنٹ کو کچھ عرصہ مزید برقرار رکھنے کا فیصلہ کیا گیا۔گزشتہ چند ماہ کے دوران کمپنی مختلف ڈیوائسز میں جیمنائی کو بطور ڈیفالٹ اسسٹنٹ متعارف کرانے پر کام کر رہی ہے۔جو صارفین اب بھی گوگل اسسٹنٹ استعمال کر رہے ہیں، انہیں جیمنائی پر منتقل ہونے کا مشورہ دیا جا رہا ہے۔ یہ اے آئی اسسٹنٹ بنیادی فون کمانڈز کے علاوہ تحریر، آواز اور تصاویر کے ذریعے بھی ہدایات سمجھنے اور مختلف کام انجام دینے کی صلاحیت رکھتا ہے۔صارفین جیمنائی کو بھی گوگل اسسٹنٹ کی طرح آواز کے ذریعے فعال کر کے متعدد روزمرہ کام انجام دے سکتے ہیں۔