کیلیفورنیا( ویب ڈیسک)گوگل نے کروم ویب براؤزر کے صارفین کی سہولت کیلئے نیا فیچر متعارف کرا دیا ہے، جس کے ذریعے ایک ڈیوائس سے دوسری ڈیوائس پر منتقل کی جانے والی ٹیب اسی جگہ کھلے گی جہاں صارف نے اسے چھوڑا تھا۔اس سے قبل کسی ٹیب کو دوسری ڈیوائس پر منتقل کرکے کھولنے کی صورت میں ویب پیج عموماً ابتدا سے ظاہر ہوتا تھا، تاہم نئے فیچر کے ذریعے کروم پہلی ڈیوائس پر صارف کی اسکرول پوزیشن محفوظ رکھے گا اور دوسری ڈیوائس پر ویب پیج وہیں سے کھلے گا جہاں اسے چھوڑا گیا تھا۔یہ سہولت بالخصوص ان صارفین کیلئے مفید ہوگی جو اسمارٹ فون پر طویل مضامین پڑھنے کے بعد انہیں کمپیوٹر پر جاری رکھنا چاہتے ہیں۔نئے فیچر کے تحت براؤزر میں جزوی طور پر پُر کیے گئے فارمز بھی محفوظ رہیں گے، چاہے صارف نے انہیں ابھی جمع نہ کرایا ہو۔کمپیوٹر پر یہ فیچر استعمال کرنے کیلئے کروم کے تھری ڈاٹ مینو میں جاکر کاسٹ کا آپشن منتخب کرنا ہوگا، جس کے بعد سیو اینڈ شیئر کے ذریعے ٹیب کو دوسری ڈیوائس پر منتقل کیا جاسکے گا۔اینڈرائیڈ ڈیوائسز پر کروم براؤزر کے شیئر مینو کے ذریعے بھی اس فیچر تک رسائی حاصل کی جاسکتی ہے۔
