کیلیفورنیا( ویب ڈیسک)گوگل نے ایک تجرباتی مصنوعی ذہانت کا ٹول متعارف کرایا ہے، جس کی مدد سے صارفین پروگرامنگ یا پیچیدہ کوڈنگ کے بغیر محض اپنا خیال بیان کرکے گیم تیار کرسکیں گے۔گوگل کے پلے گراؤنڈ نامی اس ٹول میں صارفین کو اپنی گیم کا تصور، مطلوبہ آرٹ اسٹائل اور مشینوں سے متعلق ہدایات فراہم کرنا ہوں گی، جس کے بعد اے آئی ان معلومات کی بنیاد پر قابلِ کھیل گیم بنانے کی کوشش کرے گی۔گیم تیار ہونے کے بعد صارفین اپنی پسند کے مطابق اس میں تبدیلیاں بھی کرسکیں گے۔ ٹول میں پہلے سے تیار کردہ ہدایات بھی موجود ہوں گی، جن میں ترمیم کرکے نئے گیم آئیڈیاز آزمائے جاسکیں گے، جبکہ مصنوعی ذہانت اس عمل میں رہنمائی بھی فراہم کرے گی۔صارفین اپنی تیار کردہ گیمز دوستوں کے ساتھ شیئر کرنے کے علاوہ پلے گراؤنڈ گیلری میں شائع بھی کرسکیں گے۔ اس پلیٹ فارم پر دوسرے صارفین کی بنائی ہوئی گیمز کھیلنے کی سہولت بھی ہوگی۔چونکہ یہ گیمز ویب براؤزر پر چلیں گی، اس لیے انہیں موبائل فون اور لیپ ٹاپ سمیت مختلف آلات پر کھیلا جاسکے گا۔ پلے گراؤنڈ ایپ صارف کے پلے گیمز اکاؤنٹ سے بھی منسلک ہوگی، جہاں وہ پسندیدہ گیمز کو پسند کرنے اور دوسرے تخلیق کاروں کو فالو کرنے کے ساتھ ان کی نئی گیمز دیکھ سکیں گے۔فی الحال یہ تجرباتی اے آئی ٹول امریکا میں ویب سائٹ کے ذریعے 18 سال سے زائد عمر کے صارفین کے لیے دستیاب ہوگا۔
