پاکستان میں گوگل کا دفتر ڈیجیٹل تبدیلی کی اہم پیشرفت ہے: شزا فاطمہ

اسلام آباد(ویب ڈیسک) وفاقی وزیر آئی ٹی شزا فاطمہ نے پاکستان میں گوگل کے مقامی دفتر کے قیام کو ملک میں ڈیجیٹل تبدیلی کے عمل میں اہم قدم قرار دیا ہے۔اپنے بیان میں شزا فاطمہ نے کہا کہ پاکستان میں گوگل کی موجودگی عالمی سطح پر ملک کی ڈیجیٹل معیشت پر اعتماد کا اظہار ہے، جبکہ مقامی دفتر کا قیام وزیراعظم کے ’’ڈیجیٹل نیشن پاکستان‘‘ کے وژن کی عملی عکاسی کرتا ہے۔انہوں نے کہا کہ حکومت پاکستانی صلاحیتوں کو عالمی مواقع سے منسلک کرنے کے لیے اقدامات کر رہی ہے۔ ڈیجیٹل شعبے کی ترقی سے نوجوانوں، خواتین اور نئے کاروباری اداروں کے لیے روزگار اور ترقی کے نئے امکانات پیدا ہوں گے۔وفاقی وزیر کے مطابق ڈیجیٹل مہارتوں، مصنوعی ذہانت، بادلوں پر مبنی ٹیکنالوجی اور تعلیم کے شعبوں میں گوگل کے ساتھ تعاون مزید وسعت دی جائے گی۔شزا فاطمہ نے کہا کہ پاکستان میں تیار ہونے والے کروم بکس کی علاقائی ممالک کو برآمدات کی حوصلہ افزائی بھی کی جائے گی، جبکہ گوگل سمیت عالمی ٹیکنالوجی کمپنیوں کے تعاون سے پاکستان میں ڈیجیٹل ترقی کے نئے دور کا آغاز ہوگا۔