کراچی( کامرس ڈیسک) حکومت نے ملک کی ضروریات پوری کرنے کے لیے 7 لاکھ 50 ہزار میٹرک ٹن گندم درآمد کرنے کی باضابطہ اجازت دے دی ہے، جس کے بعد ٹریڈنگ کارپوریشن آف پاکستان نے درآمد کے لیے عالمی ٹینڈر جاری کردیا۔ٹی سی پی کے مطابق درآمد کی جانے والی گندم رواں سال کی تازہ فصل پر مشتمل ہونی چاہیے، جبکہ بین الاقوامی سپلائرز کی جانب سے کم از کم 50 ہزار میٹرک ٹن گندم کی پیشکش ہی قابل قبول قرار دی گئی ہے۔ٹینڈر کی شرائط کے تحت گندم کراچی اور گوادر کی بندرگاہوں تک سی ایف آر بنیاد پر پہنچائی جائے گی۔ سپلائرز اپنی بولیاں 16 ستمبر تک جمع کراسکیں گے اور اسی روز ٹینڈرز کھولے جائیں گے۔ٹی سی پی کے مطابق درآمد شدہ گندم صوبوں کی ضرورت اور طلب کو مدنظر رکھتے ہوئے تقسیم کی جائے گی۔ سندھ کو 3 لاکھ ٹن، پنجاب کو 2 لاکھ 50 ہزار ٹن جبکہ خیبرپختونخوا کو 2 لاکھ ٹن گندم فراہم کی جائے گی۔اقتصادی سروے 2025-26 کے اعداد و شمار کے مطابق پاکستان میں سالانہ گندم کی کھپت تقریباً 3 کروڑ 13 لاکھ ٹن ہے، جبکہ گزشتہ مالی سال ملک میں گندم کی پیداوار 2 کروڑ 96 لاکھ 10 ہزار ٹن ریکارڈ کی گئی۔
