اسلام آباد( کامرس ڈیسک) حکومت نے مالی سال 2026-27 کے پہلے ماہ جولائی میں 215 ارب روپے قرض حاصل کیا، جبکہ 5 ارب روپے کی گرانٹس بھی موصول ہوئیں۔وزارتِ اقتصادی امور کی دستاویز کے مطابق جولائی میں بجٹ سپورٹ اور قلیل مدتی قرضوں سمیت غیر منصوبہ جاتی فنڈنگ کی مد میں 120 ارب روپے حاصل ہوئے، جبکہ منصوبہ جاتی فنڈنگ سے تقریباً 95 ارب روپے موصول کیے گئے۔رپورٹ کے مطابق جولائی میں غیر ملکی قرضوں اور گرانٹس کی مجموعی وصولی 763 ملین ڈالر رہی، جو گزشتہ مالی سال کے اسی ماہ میں حاصل ہونے والے 694.5 ملین ڈالر کے مقابلے میں 68.5 ملین ڈالر زیادہ ہے۔اقتصادی امور ڈویژن کے مطابق دوطرفہ اور کثیرالجہتی قرضوں کی وصولی گزشتہ سال کے مقابلے میں کم رہی، تاہم نیا پاکستان سرٹیفکیٹس کے ذریعے حاصل ہونے والی رقوم میں نمایاں اضافہ ہوا۔دستاویز کے مطابق نیا پاکستان سرٹیفکیٹس کے روایتی اور اسلامی دونوں طریقوں سے 343.99 ملین ڈالر حاصل کیے گئے، جبکہ ایک سال میں ان سرٹیفکیٹس سے حاصل ہونے والی رقم تقریباً 148 ملین ڈالر بڑھ گئی۔جولائی میں جرمنی نے 9.94 ملین ڈالر جبکہ سعودی عرب نے 7.4 ملین ڈالر کی دوطرفہ مالی معاونت فراہم کی۔رپورٹ کے مطابق کثیرالجہتی مالیاتی اداروں سے مجموعی طور پر 252.83 ملین ڈالر موصول ہوئے۔ ایشیائی ترقیاتی بینک نے 59.17 ملین ڈالر جبکہ ایشیائی بنیادی ڈھانچے کے بینک نے 6.57 ملین ڈالر جاری کیے۔اقتصادی امور ڈویژن کے مطابق عالمی بینک اور اس سے متعلقہ اداروں نے پاکستان کو 130 ملین ڈالر فراہم کیے، جو جولائی میں کثیرالجہتی مالیاتی اداروں سے حاصل ہونے والی سب سے بڑی رقم ہے۔
