جدہ( مانیٹرنگ ڈیسک)سعودی عرب کے ینبع کے وسیع علاقے میں یونانی فوج کے زیر استعمال فضائی دفاعی نظام نے ڈرونز کے ایک گروپ کو روک لیا۔خبر رساں ادارے کے مطابق یونانی سکیورٹی ذرائع نے بتایا کہ سعودی عرب میں موجود یونانی فوجی اہلکاروں نے جمعرات کو ڈرونز کے ایک جھنڈ کے خلاف کارروائی کی۔ اس دوران یونانی فوج کے پیٹریاٹ فضائی دفاعی نظام نے تین میزائل داغے۔ذرائع کے مطابق کارروائی سعودی فضائی دفاعی نظام کے ساتھ رابطے اور باہمی تعاون سے کی گئی۔ تاہم ڈرونز کی مجموعی تعداد، مار گرائے جانے والے طیاروں کی تعداد اور حملے کے ذمہ دار فریق سے متعلق معلومات سامنے نہیں آسکیں۔ینبع سعودی عرب کا اہم ساحلی علاقہ ہے جہاں تیل صاف کرنے کی بڑی تنصیبات موجود ہیں، جس کے باعث یہاں کسی بھی ڈرون یا میزائل حملے کو توانائی کی تنصیبات اور عالمی تیل کی فراہمی کیلئے حساس سمجھا جاتا ہے۔پیٹریاٹ زمین سے فضا میں مار کرنے والا جدید دفاعی نظام ہے، جسے مختلف فضائی خطرات کے خلاف استعمال کیا جاتا ہے۔
