حج 2027ء کے لیے آن لائن رجسٹریشن کا آغاز، ابتدائی مرحلے میں پاسپورٹ لازمی نہیں

اسلام آباد( پاکستان خبر)حج 2027ء کے لیے عازمین کی آن لائن رجسٹریشن کا باقاعدہ آغاز ہو گیا ہے۔ترجمان وزارتِ مذہبی امور کے مطابق عازمین وزارت کی سرکاری ویب سائٹ کے ذریعے رجسٹریشن کروا سکتے ہیں۔ ابتدائی مرحلے میں پاسپورٹ کا ہونا لازمی نہیں، تاہم حج بکنگ کے وقت پاسپورٹ ضروری ہوگا جس کی میعاد 16 نومبر 2027ء تک ہونی چاہیے۔ترجمان نے بتایا کہ صرف رجسٹرڈ افراد ہی حج 2027ء کی بکنگ کے اہل ہوں گے، جبکہ بکنگ پہلے آئیں پہلے پائیں کی بنیاد پر کوٹہ مکمل ہونے تک جاری رہے گی۔وفاقی وزیر مذہبی امور کے مطابق حج رجسٹریشن کی کوئی فیس نہیں رکھی گئی اور بیرونِ ملک پاکستانی بھی اس عمل میں حصہ لے سکتے ہیں۔ انہوں نے کہا کہ سرکاری اور نجی دونوں حج اسکیموں کے لیے رجسٹریشن لازمی قرار دی گئی ہے۔وزارت کے مطابق عازمین گھر بیٹھے آن لائن رجسٹریشن کر سکتے ہیں اور رجسٹریشن مکمل ہونے کے بعد ہی حج اسکیم کا انتخاب ممکن ہوگا۔