غزہ( مانیٹرنگ ڈیسک) غزہ سٹی میں ایک رہائشی عمارت پر اسرائیلی فضائی حملے کے نتیجے میں حماس کے مسلح ونگ قسام بریگیڈز کے شمالی یونٹ کے کمانڈر عزالدین البیک جاں بحق ہوگئے۔ان کی ہلاکت کی تصدیق اسرائیلی وزیراعظم بینجمن نیتن یاہو اور وزیر دفاع اسرائیل کاٹز نے بھی کی ہے، جبکہ فلسطینی ذرائع نے بھی عزالدین البیک کی موت کی تصدیق کی۔فلسطینی ذرائع کے مطابق عزالدین البیک نے غزہ میں اسرائیلی فوجی کارروائیوں کے دوران قسام بریگیڈز کے شمالی یونٹ کی کمان سنبھالی تھی۔ انہوں نے یہ ذمہ داری احمد الغندور کے بعد سنبھالی تھی۔رپورٹس کے مطابق اسرائیلی فضائی حملے میں غزہ سٹی کے ایک اپارٹمنٹ کو نشانہ بنایا گیا، جہاں عزالدین البیک موجود تھے۔یہ واقعہ ایسے وقت میں پیش آیا ہے جب غزہ میں جنگ بندی کے باوجود اسرائیلی حملوں کا سلسلہ مکمل طور پر ختم نہیں ہوا۔ حالیہ ہفتوں کے دوران بھی حماس سے وابستہ افراد کی ہلاکتوں کی اطلاعات سامنے آتی رہی ہیں۔اسرائیل کا مؤقف ہے کہ وہ حماس کی عسکری صلاحیتوں کی بحالی روکنے کیلئے کارروائیاں جاری رکھے ہوئے ہے، جبکہ حماس کی جانب سے عزالدین البیک کی ہلاکت پر تاحال کوئی تفصیلی باضابطہ بیان سامنے نہیں آیا۔
