حمزہ شیراز عالمی چیمپئن بن گئے، ڈبلیو بی او سپر مڈل ویٹ ٹائٹل اپنے نام کر لیا

لاہور ( سپورٹس ڈیسک)پاکستانی نژاد برطانوی باکسر حمزہ شیراز نے عالمی سطح پر شاندار کارکردگی دکھاتے ہوئے ڈبلیو بی او سپر مڈل ویٹ ٹائٹل جیت لیا ہے۔جرمنی کے باکسر ایلم بیگچ کے خلاف مقابلے میں حمزہ شیراز نے دوسرے ہی راؤنڈ میں ناک آؤٹ کے ذریعے کامیابی حاصل کی، جس کے ساتھ ہی وہ پہلی مرتبہ عالمی چیمپئن بن گئے۔فائٹ کے آغاز سے ہی پاکستانی نژاد باکسر نے جارحانہ حکمت عملی اپنائی اور مسلسل دباؤ برقرار رکھا، جس کے باعث ان کے حریف سنبھل نہ سکے اور ریفری نے مقابلہ روک دیا۔یہ ٹائٹل سابق چیمپئن کی جانب سے خالی کیا گیا تھا، جس پر حمزہ شیراز نے قبضہ جما کر عالمی باکسنگ میں اپنی موجودگی مضبوط کر دی ہے۔کامیابی کے بعد انہوں نے رنگ میں سجدہ شکر ادا کیا اور اپنی ٹیم کے ساتھ فتح کا جشن منایا۔حمزہ شیراز نے کہا کہ وہ اب 168 پاؤنڈ کیٹیگری میں تمام بڑے حریفوں کا سامنا کرنے کے لیے مکمل طور پر تیار ہیں، جبکہ سوشل میڈیا پر پاکستانی شائقین نے اس کامیابی کو قومی فخر قرار دیا ہے۔