نئی دہلی( مانیٹرنگ ڈیسک) مودی سرکار کے دور میں مسلمانوں اور دیگر اقلیتوں کے خلاف نفرت انگیز واقعات میں 13 فیصد اضافہ ہوا ہے۔ امریکی ریسرچ گروپ انڈیا ہیٹ لیب کی رپورٹ کے مطابق سال 2025ء کے دوران اقلیتوں کے خلاف 1,318 نفرت انگیز واقعات رپورٹ ہوئے، جو 2024ء کے 1,165 اور 2023ء کے مقابلے میں زیادہ ہیں۔رپورٹ کے مطابق زیادہ تر واقعات بی جے پی کی حکومت والی ریاستوں میں پیش آئے۔ خاص طور پر پاک-بھارت کشیدگی کے دوران 22 اپریل سے 7 مئی تک سب سے زیادہ 100 واقعات درج کیے گئے۔انڈیا ہیٹ لیب نے ایمنسٹی انٹرنیشنل، ہیومن رائٹس واچ اور دیگر بین الاقوامی انسانی حقوق تنظیموں کے بیانات کا حوالہ دیا، جنہوں نے مودی کی حکمرانی میں اقلیتوں کے خلاف بدسلوکی اور نفرت انگیز واقعات میں اضافہ ہونے کی نشاندہی کی ہے۔ انسانی حقوق کی بین الاقوامی تنظیمیں بھی مودی سرکار میں اقلیتوں کے خلاف بڑھتے ہوئے مظالم پر تشویش کا اظہار کر چکی ہیں۔
