اسلام آباد( پاکستان خبر) سپریم کورٹ میں بیرون ملک بھجوانے کا جھانسہ دے کر شہری سے ساڑھے 17 لاکھ روپے وصول کرنے والے ملزم کی درخواست ضمانت پر سماعت ہوئی۔جسٹس ہاشم کاکڑ کی سربراہی میں دو رکنی بینچ نے کیس کی سماعت کی، جس دوران متاثرہ شہری کے ساتھ دلچسپ مکالمہ بھی ہوا۔سماعت کے دوران جسٹس ہاشم کاکڑ نے استفسار کیا کہ ملزم نے کتنی رقم وصول کی۔ وکیل مدعی نے بتایا کہ ساڑھے 17 لاکھ روپے وصول کیے گئے تھے۔ عدالت نے متاثرہ شہری سے پوچھا کہ کس ملک جانے کے لیے پیسے دیے گئے تھے، جس پر شہری نے یونان جانے کا ذکر کیا۔جسٹس ہاشم کاکڑ نے ریمارکس دیے کہ یونان جا کر دربدر ہونا پڑتا، بہتر ہے یہاں محنت مزدوری کرو، کیونکہ کشتیوں کے ذریعے جانے والے کئی لوگ بھی ہلاک ہو جاتے ہیں۔عدالت نے استفسار کیا کہ کیا ملزم نے رقم لینے کے بعد شہری کو بیرون ملک بھجوایا یا رقم واپس کی؟ وکیل مدعی نے بتایا کہ نہ تو شہری کو بھیجا گیا اور نہ ہی رقم واپس کی گئی۔ ملزم کے دیے گئے چیک بھی باؤنس ہو چکے ہیں، جبکہ چیک باؤنس کے مقدمات الگ درج کیے گئے ہیں۔وکیل ملزم نے مؤقف اختیار کیا کہ سپریم کورٹ میں یہ ان کا پہلا مقدمہ ہے اور مہلت دی جائے۔ جسٹس اشتیاق ابراہیم نے کہا کہ عدالت عید سے پہلے فیصلہ کرے گی، اگر ضمانت بنتی ہے تو مل جائے گی ورنہ نہیں۔بعد ازاں عدالت نے کیس کی سماعت آئندہ پیر تک ملتوی کر دی۔
