لاہور( ویب ڈیسک)زیادہ تر افراد فون کی اسکرین کو اضافی تحفظ فراہم کرنے کے لیے اسکرین پروٹیکٹر استعمال کرتے ہیں۔مارکیٹ میں مختلف اقسام کے اسکرین پروٹیکٹر دستیاب ہیں، جن میں بعض سافٹ فلم جبکہ کچھ گلاس سے تیار کیے جاتے ہیں۔اگر فون کسی بلندی سے فرش پر گر جائے یا جیب میں موجود کوئی نوکیلی چیز اس سے ٹکرا جائے تو اسکرین پروٹیکٹر متاثر ہوسکتا ہے۔نتیجتاً وقت گزرنے کے ساتھ اسکرین پروٹیکٹر میں دراڑیں پڑ جاتی ہیں۔مگر کیا ایسے اسکرین پروٹیکٹر کو استعمال کرنا مناسب ہے جو بری طرح متاثر ہوچکا ہو؟مثال کے طور پر ایسے پروٹیکٹر والے فون کو استعمال کرتے ہوئے انگلیاں اس کی دھار سے زخمی ہوسکتی ہیں۔اگر اسکرین پروٹیکٹر کو زیادہ نقصان پہنچ چکا ہو تو اسکرین کا متاثرہ حصہ تحفظ سے محروم ہوجاتا ہے، جس سے اسے نقصان پہنچنے کا خطرہ بڑھ جاتا ہے۔اس کے علاوہ اسکرین کے بعض حصوں میں ٹچ اسکرین بھی درست طریقے سے کام نہ کرنے کا امکان ہوتا ہے۔ماہرین کے مطابق اگر اسکرین پروٹیکٹر خراب ہوجائے تو اسے تبدیل کردینا بہتر ہے۔وقت گزرنے کے ساتھ اسے اتارنا مشکل ہوسکتا ہے اور اس دوران فون کی اسکرین پر خراشیں بھی پڑ سکتی ہیں، خصوصاً کونوں میں۔جب اسکرین پروٹیکٹر تبدیل کرنے کا فیصلہ کریں تو اسے انتہائی احتیاط سے اتاریں تاکہ چوٹ لگنے یا نیچے موجود اسکرین کو نقصان پہنچنے سے بچا جاسکے۔اس کے لیے پہلے فون بند کریں اور پھر کیس اتار دیں۔ اس کے بعد کسی پتلے پلاسٹک کارڈ کی مدد سے پروٹیکٹر کے ایک کونے کو آہستگی سے اٹھائیں۔پروٹیکٹر اتارنے کے بعد فون کی اسکرین کو مائیکرو فائبر کپڑے سے اچھی طرح صاف کرلیں۔
