ہبل ٹیلی اسکوپ کی نئی شاندار تصویر نے خلا کے نظارے حیران کن بنا دیے

لندن( ویب ڈیسک) لندن میں ماہرین فلکیات نے یورپی خلائی ادارے کی جانب سے جاری کی گئی ایک نئی حیرت انگیز تصویر کو خلا کی دنیا میں ایک اہم پیش رفت قرار دیا ہے۔یہ تصویر ہبل خلائی دوربین سے حاصل کی گئی ہے، جس میں ایک اسپائرل کہکشاں واضح طور پر دیکھی جا سکتی ہے۔ یہ کہکشاں زمین سے تقریباً 5 کروڑ 30 لاکھ نوری سال کے فاصلے پر موجود ہے اور کانسٹیلیشن اینٹلیا کے علاقے میں واقع ہے۔ماہرین کے مطابق اس کہکشاں میں موجود ستاروں کے جھرمٹ، گیس اور گرد و غبار کے بادل نئے ستاروں کی تشکیل کے عمل کو ظاہر کرتے ہیں، جس سے کائنات کے ارتقا کو سمجھنے میں مدد ملتی ہے۔فلکیاتی ماہرین کا کہنا ہے کہ یہ کہکشاں ایسے نظام کا حصہ ہے جو ہماری اپنی کہکشاں کے نظام سے مشابہت رکھتا ہے، جس میں بڑی اسپائرل کہکشائیں اور متعدد چھوٹی بونی کہکشائیں شامل ہیں۔تصویر کو مختلف رنگوں کی روشنیوں کو ملا کر تیار کیا گیا ہے، جس سے کہکشاں کے مختلف حصوں اور ساخت کو بہتر انداز میں دیکھا جا سکتا ہے اور خلا کی خوبصورتی مزید نمایاں ہو گئی ہے۔