واشنگٹن( مانیٹرنگ ڈیسک) اسرائیلی وزیراعظم بنیامین نیتن یاہو کے دورہ امریکا کے دوران واشنگٹن ڈی سی میں سینکڑوں افراد نے احتجاجی مظاہرہ کرتے ہوئے امریکی حکومت سے مطالبہ کیا کہ وہ بین الاقوامی فوجداری عدالت کی جانب سے جاری کیے گئے وارنٹ گرفتاری پر عمل درآمد کرے۔عالمی میڈیا کے مطابق شدید بارش کے باوجود مظاہرین فلسطینی پرچم اور مختلف بینرز اٹھائے وائٹ ہاؤس کی جانب مارچ کرتے رہے۔ احتجاج کے موقع پر سکیورٹی کے سخت انتظامات کیے گئے تھے اور پولیس کی بڑی تعداد تعینات رہی۔رپورٹس کے مطابق مظاہرین کا ایک گروپ جارج ٹاؤن میں واقع فور سیزنز ہوٹل کی لابی میں بھی داخل ہو گیا، جہاں بنیامین نیتن یاہو عشائیے میں شریک تھے۔ مظاہرین نے ہوٹل کے اندر موجود ریسٹورنٹ تک پہنچنے کی کوشش کی، تاہم سکیورٹی اہلکاروں نے انہیں روک کر عمارت سے باہر نکال دیا۔احتجاج کے دوران مظاہرین نے اسرائیلی وزیراعظم کے خلاف مختلف نعرے بھی لگائے، جن میں جنگی اقدامات پر تنقید شامل تھی۔ احتجاج کی ویڈیوز سوشل میڈیا پر تیزی سے گردش کرتی رہیں۔
