کراچی( سپورٹس ڈیسک)قومی کرکٹ ٹیم کے سابق کپتان شاہد آفریدی نے کراچی کی موجودہ صورتحال پر افسوس کا اظہار کرتے ہوئے کہا ہے کہ شہر کی حالت دیکھ کر انہیں بہت شرمندگی ہوتی ہے۔سابق ٹیسٹ کرکٹر فواد عالم کے پوڈکاسٹ میں گفتگو کرتے ہوئے شاہد آفریدی نے کراچی چھوڑ کر اسلام آباد منتقل ہونے کے فیصلے کو مشکل قرار دیا۔ ان کا کہنا تھا کہ کراچی اچھے لوگوں کا شہر ہے اور انہوں نے یہاں بہت اچھا وقت گزارا، تاہم اسلام آباد بنیادی ڈھانچے اور موسم کے اعتبار سے بہتر شہر ہے۔شاہد آفریدی نے کہا کہ انہیں کراچی کی یاد نہیں آتی لیکن یہاں کے لوگ بہت یاد آتے ہیں۔ ان کے مطابق اربوں روپے کا کاروبار کرنے اور لاکھوں افراد کو روزگار فراہم کرنے والے شہر کی موجودہ حالت افسوس ناک ہے۔انہوں نے کہا کہ جب کوئی کراچی کو ’’پیرس‘‘ قرار دیتا ہے تو یہ سن کر ہنسی آتی ہے۔ شاہد آفریدی کے مطابق شاہراہِ بھٹو اچھی تعمیر کی گئی ہے، تاہم شہر کی بہتری کے لیے مزید کئی اقدامات کی ضرورت ہے، صرف ایک منصوبے کی بنیاد پر عوام کو مطمئن نہیں کیا جاسکتا۔سیاست میں آنے کے حوالے سے سابق کپتان نے بتایا کہ ایک وقت میں ان کا ارادہ سیاست میں آنے کا تھا، تاہم 2019ء میں انہوں نے اپنا فیصلہ بدل لیا اور اب سیاست کو اپنا میدان نہیں سمجھتے۔
