دبئی ( سپورٹس ڈیسک) انٹرنیشنل کرکٹ کونسل نے انگلینڈ کے تاریخی لارڈز کرکٹ گراؤنڈ اور پاکستان کے لاہور میں واقع قذافی اسٹیڈیم کی پچز کو غیر تسلی بخش قرار دیتے ہوئے دونوں وینیوز کو ایک ایک ڈی میرٹ پوائنٹ جاری کر دیا ہے۔آئی سی سی کے مطابق لارڈز میں انگلینڈ اور نیوزی لینڈ کے درمیان کھیلے گئے ٹیسٹ میچ کی پچ پر غیر معمولی سیم موومنٹ اور غیر یکساں باؤنس دیکھا گیا، جبکہ صرف دو دن میں 33 وکٹوں کے گرنے پر بھی تشویش ظاہر کی گئی۔دوسری جانب قذافی اسٹیڈیم میں ایک ون ڈے میچ کی پچ کو بھی بین الاقوامی معیار کے مطابق قرار نہیں دیا گیا۔ میچ ریفری کے مطابق پچ سست اور نیچی رہی، جس کے باعث بیٹنگ مشکل ہوئی اور آغاز سے ہی اسپنرز کو غیر معمولی مدد حاصل رہی۔آئی سی سی قوانین کے تحت غیر معیاری پچ پر میزبان وینیو کو ایک ڈی میرٹ پوائنٹ دیا جاتا ہے، جو پانچ سال تک ریکارڈ میں برقرار رہتا ہے۔کرکٹ بورڈز کو فیصلے کے خلاف چودہ دن کے اندر اپیل کا حق حاصل ہے، جبکہ قواعد کے مطابق چھ ڈی میرٹ پوائنٹس پر ایک سال اور بارہ پوائنٹس پر دو سال تک بین الاقوامی میچوں کی میزبانی پر پابندی لگ سکتی ہے۔آئی سی سی نے واضح کیا ہے کہ دونوں وینیوز کے خلاف اس سے قبل کوئی ڈی میرٹ پوائنٹ موجود نہیں تھا۔
