نیویارک( کامرس ڈیسک) عالمی مالیاتی فنڈ کی منیجنگ ڈائریکٹر کرسٹالینا جارجیوا نے پاکستان کے معاشی اصلاحاتی پروگرام پر اطمینان کا اظہار کرتے ہوئے کہا ہے کہ مالیاتی نظم و ضبط، بیرونی ذخائر اور سرمایہ کاروں کے اعتماد میں بہتری آئی ہے۔عرب نیوز کی رپورٹ کے مطابق وزیراعظم شہباز شریف سے ملاقات میں کرسٹالینا جارجیوا نے کہا کہ پاکستان کی جانب سے مضبوط اصلاحاتی پروگرام پر عمل درآمد سے معاشی استحکام میں مدد ملی ہے۔رپورٹ کے مطابق نئے قومی محصولات کے نظام، ملکی آمدنی میں اضافے اور نجکاری میں پیش رفت بھی حکومت کی اصلاحاتی کوششوں میں شامل ہے۔ آئی ایم ایف سربراہ نے کہا کہ مسلسل اصلاحات سے پاکستان میں معاشی استحکام برقرار رکھنے، اعتماد بحال کرنے اور عالمی مالیاتی منڈیوں تک دوبارہ رسائی میں مدد ملی ہے۔کرسٹالینا جارجیوا کے مطابق اصلاحات کا تسلسل معاشی ترقی اور عوام کے معیار زندگی میں بہتری کا باعث بن سکتا ہے، جبکہ مزید اقدامات سے پاکستان کی معاشی نمو کو تیز کرنے میں مدد ملے گی۔رپورٹ کے مطابق آئی ایم ایف نے پاکستان کے 7 ارب ڈالر کے اقتصادی پروگرام کے چوتھے جائزے اور 1.4 ارب ڈالر کے موسمیاتی لچک پروگرام کے تیسرے جائزے پر مذاکرات شروع کردیئے ہیں۔ دونوں جائزوں کی کامیابی سے پاکستان کے لیے تقریباً 1.2 ارب ڈالر کی نئی مالی معاونت کی راہ ہموار ہوسکتی ہے۔وزیراعظم شہباز شریف نے آئی ایم ایف سربراہ سے ملاقات میں ادارے کے تعاون سے جاری اصلاحاتی پروگرام پر عمل درآمد کا عزم بھی ظاہر کیا۔
