آئی ایم ایف شرط، ایکسپورٹ پراسسنگ زونز کی مقامی فروخت پر پابندی کا فیصلہ

اسلام آباد( کامرس ڈیسک) وفاقی حکومت نے عالمی مالیاتی فنڈ (آئی ایم ایف) کی شرائط کے تحت ستمبر 2026 سے ایکسپورٹ پراسسنگ زونز کی تیار کردہ مصنوعات کی مقامی مارکیٹ میں فروخت کی اجازت ختم کرنے کا فیصلہ کر لیا ہے۔وزارت خزانہ کے حکام کے مطابق نئی پالیسی کے تحت ایکسپورٹ پراسسنگ زونز کو اپنی مکمل پیداوار بیرون ملک برآمد کرنا ہوگی اور مقامی مارکیٹ میں فروخت کی سہولت دستیاب نہیں رہے گی۔حکام کا کہنا ہے کہ اس وقت ایکسپورٹ پراسسنگ زونز کو اپنی 20 فیصد پیداوار مقامی مارکیٹ میں فروخت کرنے کی اجازت حاصل ہے، تاہم آئی ایم ایف نے اس رعایت کو برقرار رکھنے کی پاکستانی درخواست مسترد کر دی ہے۔وزارت خزانہ کے مطابق حکومت نے مزید ایکسپورٹ پراسسنگ زونز قائم کرنے کی اجازت بھی طلب کی تھی، لیکن آئی ایم ایف کی جانب سے اس درخواست کو بھی منظور نہیں کیا گیا۔حکام نے بتایا کہ حکومت آئندہ اقتصادی جائزے کے دوران دوبارہ درخواست کرے گی کہ ایکسپورٹ پراسسنگ زونز کو مقامی مارکیٹ میں محدود مقدار میں مصنوعات فروخت کرنے کی اجازت برقرار رکھی جائے۔وزارت خزانہ کے مطابق مقامی مارکیٹ میں فروخت کی سہولت ختم کرنے سے متعلق تجویز فیڈرل بورڈ آف ریونیو (ایف بی آر) کو بھی ارسال کی جا رہی ہے تاکہ آئندہ اقدامات کیے جا سکیں۔