اسلام آباد( کامرس ڈیسک)پاکستان اور عالمی مالیاتی فنڈ کے درمیان مذاکرات کے دوسرے روز کاروباری سرگرمیوں میں آسانی، ٹیکس اصلاحات اور سرمایہ کاری سمیت مختلف معاشی امور پر بات چیت ہوگی۔ذرائع کے مطابق آئی ایم ایف وفد اوورسیز انویسٹرز چیمبر آف کامرس کے نمائندوں سے ملاقات کرے گا، جس میں کاروباری ماحول، بجلی کی قیمت اور ترسیل سے متعلق مسائل زیر بحث آنے کا امکان ہے۔مذاکرات میں ٹیکس اصلاحات کے ساتھ ٹیکس دہندگان کو فراہم کی جانے والی سہولیات پر بھی تبادلہ خیال کیا جائے گا، جبکہ آئی ایم ایف مشن تکنیکی مذاکرات میں بھی شریک ہوگا۔ذرائع کا کہنا ہے کہ تکنیکی سطح کے مذاکرات میں جاری کھاتے کے خسارے، بنیادی شرح سود اور شرحِ تبادلہ سمیت اہم معاشی معاملات کا جائزہ لیا جائے گا، جبکہ پاکستان میں براہ راست غیر ملکی سرمایہ کاری سے متعلق بھی آئی ایم ایف وفد کو بریفنگ دی جائے گی۔مذاکرات کے دوران یورو بانڈ کے کامیاب اجرا اور بیرونی ذرائع سے حاصل ہونے والی رقوم سے بھی آگاہ کیا جائے گا، جبکہ مہنگائی پر قابو پانے کے لیے زری پالیسی کے مؤثر استعمال پر بھی گفتگو متوقع ہے۔
