لاہور ( سپورٹس ڈیسک)بھارتی کرکٹ ٹیم کا دورۂ بنگلادیش ایک مرتبہ پھر تاخیر کا شکار ہوگیا ہے، تاہم دونوں ملکوں کے کرکٹ بورڈز سیریز کے انعقاد کے لیے نئی تاریخوں کی تلاش میں ہیں۔بنگلادیش کرکٹ بورڈ کے صدر تمیم اقبال نے کہا ہے کہ سیریز منسوخ ہونے کا فیصلہ نہیں کیا گیا، بلکہ بنگلا دیش کرکٹ بورڈ اور بھارتی کرکٹ بورڈ باہمی مقابلوں کے لیے نئی ونڈو تلاش کر رہے ہیں۔تمیم اقبال کے مطابق دونوں بورڈز سیریز کے انعقاد کے لیے سنجیدہ اور پُرعزم ہیں۔ انہوں نے کہا کہ ہمیں اب بھی سیریز ہونے کی امید ہے، اگر ایسا نہ ہوتا تو وہ اتنے پُرامید الفاظ استعمال نہ کرتے۔واضح رہے کہ بھارتی کرکٹ ٹیم نے اگست اور ستمبر میں بنگلادیش کا دورہ کرنا تھا، جہاں دونوں ٹیموں کے درمیان 3 ایک روزہ اور 3 ٹی ٹوئنٹی میچز کھیلے جانے تھے۔بھارتی ٹیم کا گزشتہ سال بھی بنگلادیش کا دورہ سیاسی حالات کے باعث ملتوی کردیا گیا تھا، جبکہ دونوں ممالک کے موجودہ سیاسی تعلقات کے سبب رواں سال بھی سیریز کے انعقاد پر خدشات برقرار تھے۔
