بھارت کی افغانستان کے خلاف ریکارڈ ساز ٹیسٹ فتح، اننگز اور تین سو رنز سے تاریخی شکست

ممبئی( سپورٹس ڈیسک)بھارت نے ٹیسٹ کرکٹ میں افغانستان کے خلاف اپنی اب تک کی سب سے بڑی کامیابی حاصل کرتے ہوئے ایک تاریخی میچ میں اننگز اور تین سو رنز سے بھاری شکست دے دی۔ یہ واحد ٹیسٹ میچ نیو چندی گڑھ میں کھیلا گیا۔میچ کی پہلی اننگز میں بھارت نے آٹھ وکٹوں کے نقصان پر پانچ سو چونسٹھ رنز بنا کر اننگز ڈکلیئر کی۔ کپتان شُبھمن گل نے ایک سو چھبیس رنز کی شاندار اننگز کھیلی جبکہ کے ایل راہول نے ایک سو رنز اسکور کیے۔ سائی سدھرسن اور رشبھ پنت نے اکیاسی اکیاسی رنز بنا کر ٹیم کی پوزیشن مضبوط کی۔افغانستان کی جانب سے محمد سلیم نے شاندار بولنگ کرتے ہوئے چھ وکٹیں حاصل کیں جبکہ ضیا الرحمان اور حشمت اللہ شاہدی نے ایک ایک وکٹ حاصل کی۔جواب میں افغانستان کی ٹیم پہلی اننگز میں صرف ایک سو بپن رنز پر ڈھیر ہو گئی، جس کے بعد بھارت نے فالو آن کرایا۔ دوسری اننگز میں بھی افغان بیٹنگ لائن نہ سنبھل سکی اور ٹیم ایک سو بارہ رنز پر آؤٹ ہو گئی۔افغانستان کی جانب سے پہلی اننگز میں رحمت شاہ نے ساٹھ رنز جبکہ دوسری اننگز میں صدیق اللہ اتل نے بیالیس رنز بنا کر مزاحمت کی کوشش کی۔بھارت کی جانب سے پہلی اننگز میں ڈیبیو کرنے والے مانوو ستھر نے شاندار بولنگ کرتے ہوئے چھ وکٹیں حاصل کیں، جبکہ دوسری اننگز میں کلدیپ یادو اور واشنگٹن سندر نے بھی افغان بیٹنگ لائن کو شدید نقصان پہنچایا۔بھارت نے یہ میچ اننگز اور تین سو رنز سے جیت کر ٹیسٹ کرکٹ میں اپنی سب سے بڑی فتح حاصل کی، جبکہ افغانستان کو بھی ٹیسٹ کرکٹ میں اننگز کے اعتبار سے بدترین شکست کا سامنا کرنا پڑا۔