بھارت پانی کو ہتھیار کے طور پر استعمال کرنا چاہتا ہے، سنگین نتائج ہوں گے: اسحاق ڈار

اسلام آباد(پاکستان خبر)نائب وزیراعظم اسحاق ڈار نے کہا ہے کہ بھارت پانی کو بطور ہتھیار استعمال کرنے کی کوشش کر رہا ہے، جس کے سنگین نتائج برآمد ہو سکتے ہیں۔قومی اسمبلی میں اظہار خیال کرتے ہوئے انہوں نے کہا کہ سندھ طاس معاہدے کو یکطرفہ طور پر معطل کیا گیا ہے، جبکہ عالمی قوانین کے مطابق اس معاہدے پر عمل درآمد بھارت کی ذمہ داری ہے۔انہوں نے کہا کہ معاہدے کے فریم ورک میں تنازعات کے پرامن حل کا واضح طریقہ کار موجود ہے، تاہم بھارت کی جانب سے اس حوالے سے غیر قانونی اقدام کیا گیا ہے۔اسحاق ڈار کے مطابق پاکستان اقوام متحدہ کے چارٹر پر عمل کے لیے پرعزم ہے اور خطے میں امن و استحکام کا خواہاں ہے۔نائب وزیراعظم نے کہا کہ پانی کو ہتھیار کے طور پر استعمال کرنے کی کسی بھی کوشش کے سنگین اور منفی نتائج ہوں گے، اور پاکستان اپنے عوام کے حقوق کے تحفظ کے لیے ہر فورم پر آواز بلند کرے گا۔