اسلام آباد ( کامرس ڈیسک) مشرق وسطیٰ میں کشیدگی کے اثرات پاکستان کی معیشت پر نمایاں ہونے لگے ہیں اور رمضان کے بعد دوسرے ہفتے بھی مہنگائی میں اضافہ ریکارڈ کیا گیا ہے۔ادارہ شماریات کی ہفتہ وار رپورٹ کے مطابق حالیہ ہفتے مہنگائی میں ایک اعشاریہ صفر ایک فیصد اضافہ ہوا، جبکہ اس سے قبل ہفتے میں صفر اعشاریہ ستانوے فیصد اور اس سے پہلے صفر اعشاریہ اکیس فیصد اضافہ ریکارڈ کیا گیا تھا۔رپورٹ کے مطابق سالانہ بنیاد پر مہنگائی کی شرح آٹھ اعشاریہ چوبیس فیصد سے بڑھ کر نو اعشاریہ بارہ فیصد تک پہنچ گئی ہے۔ حالیہ ہفتے پندرہ اشیائے ضروریہ مہنگی ہوئیں، نو اشیا سستی ہوئیں جبکہ ستائیس اشیا کی قیمتوں میں استحکام رہا۔مہنگی ہونے والی اشیا میں مٹن، ٹماٹر، بیف، انڈے، دودھ اور مرغی شامل ہیں، جبکہ ایل پی جی کی قیمتوں میں تیرہ اعشاریہ اٹھائیس فیصد، انڈوں میں دو اعشاریہ تئیس فیصد اور چکن میں دو اعشاریہ تیرہ فیصد اضافہ ریکارڈ کیا گیا۔ اس کے علاوہ دال ماش، مٹن، دودھ، دہی، بیف اور دال مسور کی قیمتوں میں بھی اضافہ دیکھا گیا۔دوسری جانب آلو، ٹماٹر، پیاز، لہسن، چینی، سرسوں کا تیل اور آٹے کی قیمتوں میں کمی ریکارڈ کی گئی، تاہم مجموعی طور پر مہنگائی کا دباؤ برقرار ہے اور عوام کو ریلیف نہ مل سکا۔
