بلوچستان میں سیکیورٹی فورسز کی کارروائیاں، 8 دہشت گرد ہلاک: آئی ایس پی آر

راولپنڈی( پاکستان خبر) بلوچستان میں سیکیورٹی فورسز کی دو اہم کارروائیوں کے دوران 8 دہشت گرد ہلاک ہو گئے۔پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے بلوچستان کے اضلاع خاران اور مستونگ میں 25 اور 26 جون کو انٹیلی جنس معلومات کی بنیاد پر دو تیز رفتار کارروائیاں کیں، جن میں بھارتی حمایت یافتہ گروہ ’’فتنۃ الہندوستان‘‘ سے تعلق رکھنے والے دہشت گردوں کو نشانہ بنایا گیا۔آئی ایس پی آر کے مطابق 25 جون کو ضلع خاران میں دہشت گردوں کی نقل و حرکت کی خفیہ اطلاع پر کارروائی کی گئی، جس کے نتیجے میں 3 دہشت گرد ہلاک اور متعدد زخمی ہوئے۔بعد ازاں دوسری کارروائی میں مزید دہشت گردوں کو نشانہ بنایا گیا، جس کے دوران مجموعی طور پر 8 دہشت گرد ہلاک ہوئے۔ترجمان پاک فوج کے مطابق یہ کارروائیاں دہشت گردی کے خاتمے اور ملک میں امن و امان کی صورتحال کو بہتر بنانے کے لیے جاری انٹیلی جنس بیسڈ آپریشنز کا حصہ ہیں۔