انویسٹ پاک پورٹل کا افتتاح، سرمایہ کاری کے نئے دور کا آغاز: وزیر خزانہ

اسلام آباد( کامرس ڈیسک) وفاقی وزیر خزانہ محمد اورنگزیب نے انویسٹ پاک پورٹل کا باقاعدہ افتتاح کر دیا، جسے ملک میں سرمایہ کاری کے عمل کو ڈیجیٹل اور تیز تر بنانے کی جانب ایک اہم قدم قرار دیا جا رہا ہے۔تقریب سے خطاب کرتے ہوئے وزیر خزانہ نے گورنر اسٹیٹ بینک کو اس اقدام پر مبارکباد دی اور کہا کہ انویسٹ پاک پورٹل سرمایہ کاری کے نئے دور کا آغاز ہے۔انہوں نے کہا کہ پاکستان اسٹاک مارکیٹ میں سرمایہ کاری کرنے والوں کی تعداد میں مسلسل اضافہ ہو رہا ہے، جو ملکی معیشت پر اعتماد کی علامت ہے۔محمد اورنگزیب کے مطابق حکومت نوجوانوں، خصوصاً جین زی کو سرمایہ کاری کی جانب راغب کرنے کے لیے مؤثر اقدامات کر رہی ہے۔ ان کا کہنا تھا کہ یہ ڈیجیٹل پلیٹ فارم عالمی معیار کی سہولیات فراہم کرے گا۔وفاقی وزیر نے مزید کہا کہ انویسٹ پاک پورٹل جیسے جدید ڈیجیٹل منصوبے ایک اہم سنگِ میل کی حیثیت رکھتے ہیں، جبکہ معاشی ترقی میں نجی شعبے کا کردار انتہائی اہم ہے۔انہوں نے اس امید کا اظہار کیا کہ یہ پورٹل سرمایہ کاری کے عمل کو مزید شفاف، آسان اور تیز رفتار بنانے میں مددگار ثابت ہوگا۔