کراچی( کامرس ڈیسک)انٹرنیشنل پیکیجنگ فلمز لمیٹڈ (آئی پیک) نے یورپی مارکیٹ میں توسیع کا اعلان کرتے ہوئے پرتگال میں اپنی مکمل ملکیتی ذیلی کمپنی قائم کرنے کا فیصلہ کر لیا ہے۔تفصیلات کے مطابق یہ ذیلی کمپنی آئی پیک کنیکٹ پیکیجنگ میٹریلز ٹریڈنگ ایف زیڈ سی او کے ذریعے قائم کی جائے گی، جو دبئی، متحدہ عرب امارات میں قائم آئی پیک گروپ کی مکمل ملکیتی کمپنی ہے۔رجسٹریشن کے بعد پرتگال میں قائم ہونے والی کمپنی آئی پیک گروپ کا حصہ ہوگی اور یورپی یونین میں گروپ کے تجارتی پلیٹ فارم کے طور پر کام کرے گی۔ تاہم اس منصوبے پر عملدرآمد تمام متعلقہ قانونی، ضابطہ جاتی اور کارپوریٹ منظوریوں سے مشروط ہوگا۔آئی پیک کے مطابق پرتگال میں ذیلی کمپنی کا قیام گروپ کی عالمی توسیعی حکمت عملی میں ایک اہم پیش رفت ہے، جس سے یورپی یونین میں کمپنی کی موجودگی مضبوط ہوگی اور خطے کے موجودہ و نئے صارفین تک رسائی میں اضافہ ہوگا۔اعلامیے میں کہا گیا ہے کہ پرتگال میں قائم کمپنی یورپی یونین میں آئی پیک گروپ کی تجارتی سرگرمیوں کے لیے مرکزی مرکز کے طور پر خدمات انجام دے گی۔ اس کے ذریعے صارفین، پیکیجنگ کنورٹرز، ڈسٹری بیوٹرز اور دیگر صنعتی شراکت داروں کے ساتھ تعاون کو فروغ دیا جائے گا۔کمپنی کا کہنا ہے کہ نئی ذیلی کمپنی یورپی مارکیٹ کی ضروریات کے مطابق مصنوعات اور کاروباری حکمت عملی کو بہتر بنانے میں بھی مددگار ثابت ہوگی۔آئی پیک کے مطابق پرتگال میں توسیع اس کے وسیع عالمی وژن کا حصہ ہے، جس کے تحت پاکستان میں موجود مضبوط پیداواری صلاحیتوں کو عالمی تجارتی نیٹ ورک سے منسلک کرتے ہوئے پیکیجنگ فلمز کے شعبے میں اپنی بین الاقوامی موجودگی مزید مستحکم کی جا رہی ہے۔
